Испаний Barcelona клуб урд шөнө La Liga-ийн 28-р тойргийн тоглолтоо хийж өөрийн Camp Nou цэнгэлдэхдээ Granada клубийг хүлээн авч 5:3 харьцаагаар хожсон байна. Тус тоглолтод Xavi, Cristian Tello нар гоолдож мөн Lionel Messi хет-трик хийсэн юм. Аргентин эр Messi 3 гоол хийснээр Barcelona клубийн бүх цаг үеийн хамгийн олон гоолын рекорд болох 232 гоолыг эвдлээ.
Barca-гийн бүх цаг үеийн хамгийн олон гоолын рекордыг Испани хөлбөмбөгчин Cesar Rodriguez 232 гоолтойгоор эзэмшиж байсан бол Messi энэ тоглолтоор 234 гоолтой боллоо.
2011 оны дэлхийн шилдэг хөлбөмбөгчин Messi-гийн хувьд энэ улиралд гоолын тэнгэртэй байгаа. Тэрээр саяхан Аваргуудын лигийн шилдэг 16-гийн хариу тоглолтод Германы Bayer Leverkusen-ийн хаалганд 5 гоол хийж 1 тоглолтод хамгийн олон гоол хийсэн тоглогчоор тодроод байгаа.
Эдүгээ дөнгөж 24-хөн настай Messi-гийн хувьд багийнхаа төлөөх албан ёсны тоглолтод 234 гоол оруулаад байгаа бөгөөд түүнд цаашид олон жил тоглох хугацаа бий.
Тэрээр мөн энэ улиралд багийнхаа төлөөх нийт 45 тоглолтод оролцож 54 гоолыг оруулчихаад байгаа юм.
Тоглолтын дараа түүний удирдагч, ахлах дасгалжуулагч Josep Guardiola: “Үүн шиг амжилтыг тогтоох хөлбөмбөгчин цөөхөн тааралдах байх. Гэхдээ тэр үүнийг хийж чадлаа. Одоо түүнийг сагсан бөмбөгийн алдарт тоглогч Michael Jordan-тай харьцуулж болохоор боллоо.
Leo Messi Cesar-ийн амжилтыг давсан энэ өдөр бид түүхэн тоглолтыг хийлээ. Leo түүхийн нэгэн хуудсанд бичигдлээ. Тэр үүгээр ч зогсохгүй. Цаашид ч түүхийг бүтээх болно.
Би энэ бүгдийг Messi-гийн тухай ярилаа. Тэр зөвхөн гоол хийгээд байдаггүй. Тэр агуу гоолыг хийдэг. Гоол бүр нь өмнөхөөсөө илүү байдаг. Бид үнэхээр гайхалтай явдлын гэрч боллоо.
Бид түүний төлөө маш их баярлаж байна” хэмээн хэлжээ.